【香港歷史】而家好多打工仔返工都對住電腦，但五、六十年代，有大部份人都靠勞力搵食，唔知呢幾個行業，大家有無聽過呢？
「執字粒」：即係活字印刷，當年印刷屬於一門手藝，要喺海量嘅字庫搵到啱嘅字，逐粒放入去個模度做排版。但1970年代後柯式印刷日益流行，而隨著電腦普及，印刷只需要一個制就搞掂，令到呢個行業消失。
「賣飛機欖」：1950至1970年代，街上會有小販大嗌「有無人要買飛機欖」，然後將甘草欖拋上去俾七層高嘅居民，而買家就會喺陽台拋錢俾小販，由於過程好似放飛機，所以有飛機欖呢個稱號。但往事只能回味，大家而家想買零食，上網就買到。
「穿膠花」：講起「穿膠花」，大家一定諗起李嘉誠先生，1970年代左右香港被稱為「世界塑膠花王國」，呢類輕工業亦造就咗唔少婦女童工，將膠花帶返屋企做加工幫補家計。但隨住香港工業北移，已經無再見過呢類工種。
「磨鉸剪」：以前嘅人生活物質唔太充裕，所以好多時都會揀修補壞咗嘅物品多過換新；以前當修補師父拎住工具沿街喊叫「鏟刀磨鉸剪」，就會有好多居民衝去搵師父即場進行修補；聽講仲會有人專門上門替人補鑊、箍煲和修理木洗衣板添。
你仲聽過有咩消失的職業，可以同我哋分享㗎。
資料來源：Google image、維基百科
